Эрталаб метрода кетаётгандим. Навбатдаги бекатда поездга чиққан қизни кўриб, барча йўловчилар, шу жумладан, мен ҳам унга ҳавас ила тикилиб қолдик. Сабаби, бу қизнинг сочлари нақ тиззасигача тушарди. Уни кўрганларда беихтиёр «Сочларни шу даражада ўстириш учун нима қилиш керак экан-а?» деган савол туғилганлиги табиий. Бу саволнинг жавобини эса саҳифамиз қаҳрамонларидан билиб оламиз.

«Хафа қилиб» қўйишдан қўрқаман»

Моҳинабону Ғаффорова, 18 ёш, талаба. Сочининг узунлиги 1 метр (илидизидан учигача)

— Оиламизда кўпчиликнинг сочи узун бўлганлиги учун менинг соч ўстиришим оддий ҳол. Ўн ёшимдан буён сочимга қайчи тегмаган, шунингдек, кимёвий бўёқлар билан бўямаганман. Сочим узун бўлишида бувижонимнинг ҳиссаси жуда катта. У кишининг маслаҳатларига кўра сочларимни ювишда доимо табиий воситалардан фойдаланаман. Вақти-вақти билан бошимга тухум, қатиқ, асал, ош сиркаси ва қалампирли ниқоб қўйишни унутмайман. Бувим «Сочни ёйиб юришнинг хосияти яхшимас» деб таъкидлаганлари учун ҳам сочларимни ўрилган ҳолда турмаклайман. Тўй-тантаналарга сочимни чиройли турмаклатиб боришни хоҳласам-да, оила аъзоларим «кўз тегади» деб бунга қарши бўлишади. Ноилож сочимни узунлиги билинмайдиган қилиб йиғиб кетишга мажбур бўламан. Бир неча йил аввал укам ҳазиллашиб сочимга сақич ёпиштириб қўйганида йиғлаб-йиғлаб, бир тутамини кесиб ташлагандим.

Очиғи, соч ҳаддан ташқари узун бўлса, уни тараш, парваришлаш ҳам қийин бўлади, аммо қаловини топсангиз, қор ҳам ёнади. Айтайлик, сочим чигаллашиб кетса, дарров сутда чаяман ва қийин вазиятдан осонгина чиқаман. Қизиғи шундаки, парваришлашдан эриниб, сочимни кестириш ҳақида ўйлаб қолсам, сочларим тутамлаб тўкила бошлайди. Мендан хафа бўлишадими, билмадим...

«Тарашга камида ярим соат вақтим кетади»

Маҳбуба Холмуҳаммедова, 23 ёш, банк ходимаси. Сочининг узунлиги 1 метру 40 сантиметр.

— Сочларимни аввалига ҳавас учун кесмаган бўлсам, кейинчалик кўзим қиймагани учун ҳам қайчи теккизишга ботинолмаганман. Ёшлигимда жуда содда эдим, бир куни шўх синфдошларим «Сочингни ёқиб юбораман», деб ҳазиллашишса, қўрққанимдан эртасигаёқ сочимни йиғиб келибман (кулади). Бир сафар эса сочларимнинг учи «гуллагани» туфайли салгина кестириш учун сартарошхонага кирдим. Сартарош аёл айтганимдан нақ бир қарич ортиқ кесиб юборса, денг! Сочларим «қисқариб» қолганига кўниколмай, анча вақтгача худди бир нарсамни йўқотиб қўйгандек бўлиб юрдим.

Эрталаблари эса ярим соат эртароқ уйқудан уйғонишимга тўғри келади. Чунки сочимни тараб, турмаклашнинг ўзига камида ярим соат вақт кетади. Сочимни ҳадеб салонларда турмаклатавермайман. Чунки кейин лак ва тароқ ёрдамида ажабтовур қилиб турмакланган узун сочнинг чигилини ечишнинг ўзи бўлмайди!

«Тушларимда ҳам уларни асрайман»

Сайёра Исроилова, 24 ёш, ўқитувчи. Сочининг узунлиги 1 метру 40 сантиметр.

— Икки опам, онам ва холамнинг сочлари узун бўлганигами, соч кесиш хаёлимга ҳам келмаган. Ҳамма сочимга ҳавас билан қарагани хуш ёқади, албатта, аммо «сочлари тақимига тушган гўзал» бўлишнинг ҳам ўзига яраша қийин томонлари бор. Масалан, фендан умуман фойдаланмаганим учун соч ювганимдан сўнг уларни қуритишга қийналаман. Соч парваришида фойдаланадиган сирим ёки алоҳида бир усулим йўқ. Тўй-зиёфатларга борганда эса сочимни оддийгина ўриб қўя қоламан. Мактабда аксинча сочимни йиғиб юраман, акс ҳолда ўқувчиларим дарҳол «Усто-о-оз, сочингиз мунча узун, ювишингизга қанча шампунь кетади?» деган саволдан бўшамай қолишади, бу эса уларни дарсдан чалғитади. Кўча-кўйда, автобус, дўконларда ҳам таниш-нотаниш одамлардан шундай саволни кўп эшитаман. Бундай саволларга жавоб бераверишдан кўра, сочларни йиғиб юриш осонроқ. Сочимнинг узунлигига ўрганиб қолганим учунми, кўпинча тушимда уларни кимдир кесиб ташлаётганини кўраман. Шунда қўрққанимдан йиғлаб, уйғониб кетаман...

«Кокилларимга ошиқ бўлган»

Муқаддас Жўраева, 24 ёш, мухбир. Сочининг узунлиги 1 метру 20 сантиметр.

— Онам ёшлигимда «Майда ўрим кокилларнинг устида фаришта ўтиради», деб таъкидлар, «Уйқум келди» деганимга қарамай, гап билан чалғитганча, сочимни майда қилиб ўриб қўярди. Бунга тахминан бир ярим соатча вақт кетарди. Ҳатто бўлажак турмуш ўртоғим билан учрашувга чиқадиган куним ҳам онам сочимни майда қилиб ўриб қўйганди. Оқибатда бўлғуси куёвтўра мени бир кўришдаёқ севиб қолган экан. Ўзининг айтишича, ўшанда мени қўл телефонига секингина суратга олган, кейин уйида роса томоша қилган экан. Ҳозир бир оиланинг бекасиман, битта фарзандим бор. Уй юмушлари билан овора бўлиб, сочимга эътибор қаратишга вақт топа олмаяпман. Шунга қарамай, турмуш ўртоғим биринчи учрашувимиз ҳақида эслатиб туришни яхши кўради. «Қанча пул керак бўлса бераман, фақат салонга бориб сочингни қирқ кокил қилиб ўрдириб келгин. Ахир сени кокилларинг учун севиб қолганман-ку!» деган гапларига кулибгина қўя қоламан.